-
.
Ariete: Gavì un fiatin de casini in giro e no ghe sarà tempo pai bagoli, ma gavarì le vostre sodisfasion, sopratuto in quea roba ca ve da pansieri da qualche tempo. El weekend sarà beissimo: organisè qualcosa coi morosi.
Toro: Sta stimana comprè un par de mudande de na taja in pì parchè gavarì un cueo ca metà basta! Quindi, no ste impigrirve e deve da fare pì ca podì parchè tute le robe le 'ndarà ben, anca i progeti pì ambisiosi. Ciapeghe drento parchè in tel fine stimana podaria eserghe qualche discusion. Ricordeve, pugno de fero in tel guanto de veludo. CIN!
Gemelli: Mejo se fasì un bijeto par qualche parte, distante, con data de ritorno tra na stimana. Queo ca gavì lassà indrio, persone e cose, ve se ritorce contro e il conto el sarà pesante. Ocio! Mejo no farse vedare par un tocheto e magari far qualche amicissia nova.
Cancro: El sarà un bon periodo par el sgobo. Quei risultati pai quali gavì lavorà sodo dovaria rivare e comunque i xe visini. Mejo, anca parchè le serate le se prospetta frizantine come un prosecco de chel bon: ciapeghe drento.“
Leone: No xe el momento de straiarse in tei prà a vardar le nuvoe: mejo rimbocarse le maneghe e sopratuto avere oci de drio a schena parchè ghe xe qualchedun ca ve voe fare un brutto tiro... In tel weekend ste tenti a queo ca disì o tirarè su un casin ca metà basta
Vergine: La sarà na stimana decisamente bona, sia in tel sgobo ca coi morosi e la fameja. Ciapeve anca qualche sera da pasare coi amici parchè sì insolitamente simpatici e xe un piacere star con voialtri. Domenega, invese, ste casa... gavarì la Luna
Bilancia: No xe sta un bel periodo e gavì barufà anca col gato... No sì mia stufi? Deve na calmada anca parchè xe el momento giusto par chiarire zerte situasion che le xe ga complicà un fiatin massa. Rifugieve in leto, no da soli!
Scorpione: Ve lo digo subito: no la sarà mia la vostra stimana. Qualsiasi cosa gavrì da fare ste tenti parchè la sfiga la xe drio l'angolo. Cerchè de tigner bota e de no ciaparvela con chi ca ve sta intorno, ca no i c'entra ninte. Le robe le 'ndarà mejo in tel weekend!
Sagittario: Ste tenti ala primavera parchè in tel sgobo dovì restare concentrai che zà le robe no le va massa ben de suo. Usè tuta la diplomasia ca gavì, e anca quea ca no gavì, par no mandare in ciupese i capi, ca no xe mia na roba inteligente. Consoleve coi morosi.
Capricorno: Corajo ca xe drio scominsiare un periodo bon. Ghe sarà bone robe sia in tel sgobo che coi morosi e i single podarà trovar qualcosa de intersante. L'unica roba xe ca dovì star tenti a qualcuno che voe provocarve: ste chieti e 'ndè vanti par la vostra strada“
Acquario: Tigneve streta la musina parchè no ghe sarà bone notissie in tel campo economico. No ste darve alo shopping sfrenato, ansi, consegnè el bancomat a qualchedun e, magari, feve ofrire na cenetta romantica dai morosi: no i se ne pentirà.
Pesci: Ok, lucidè le pinne, scaldè la coa ca xe ora de ragiungere quei obietivi ca ve xeri prefisà da tempo, el momento xe queo bon. Ocio però a no imusonarve con chi podaria darve na man, ste chieti! El weekend sarà mia entusiasmante anca parchè coi morosi a sì drio anoiarve un pocheto massa...
. -
.
Oroscopo vicentino dela stimana fino al 1 majo
Ariete: L'inissio del stimana el xe all'insegna dell'amor, queo romantico però. A sì massa strachi par dedicarve a queo pratico... portè pasiensa, el xe el periodo. In compenso el weekend sarà foriero de bee feste coi amici: mejo de ninte
Toro: El sarà un periodo aureo par el sgobo. Cossa vold dir "aureo"?! D'oro, somari, altro che Tori!. Farì amicissie vips ma ocio a no andar in giro massa scoerti o ve ciapè sù qualcosa. In tell'ammor a fasì sc-iantisi, no ste farve trovare coe mudande vecie e fasì quel che ghe xe da fare prima de venare, ca el weekend sarà de feston... CIN!
Gemelli: La sarà mia na stimana par far grandi progetti o semplicemente robe nove: mejo concentrarse su queo ca savì far ben e queo ca gavì, morosi compresi. Anca in tel sgobo ris-ciè de far casìn e parfin par organisare el weekend no sì mia in bola. Deleghè, ca xe mejo.
Cancro: Preparè la musina ca finalmente xe drio rivare qualche scheo in più. No ste darve alo shopping sfrenà, ca xe mejo risparmiare par le vacanse, magari. Portè pasiensa in tel meso dela stimana ca el weekend el sarà bolente!
Leone: Ste chieti coi vostri coleghi ca, se vardè ben, magari no gavì tute le rason e barufare non fa ben a nisun. Sì diplomatici e deve da fare fora: ghe xe incontri interesanti in vista, sia in tel sgobo che al bar. Ocio ala parte in meso dela stimana.
Vergine: Voialtri gavì bisogno ca le robe sia precise e in ordine e sta stimana trovarè, come sempre, qualche bona solusion par far quadrare tuto, anca se nol sarà mia fassie. Cerchè de esser diplomatici con qualchedun che voe solo rompere i maroni, xe na presenza passeggera...
Bilancia: Podaria eser na stimana de cambiamenti e, se gavì fiuto, anca i cambiamenti giusti, par quanto riguarda i schei. Pensè ai fatti vostri, anca parchè ghe zè baruffe in vista coi morosi e coi coleghi. Portè pasiensa: el weekend el sarà perfetto, anca pai single pì sfiducià!
Scorpione: Hm, no la sarà mia na bona stimana. Vardeve davanti e anca par de drio, parchè ghe xe qualchedun, o pì de qualchedun, ca ga voja de romperve i maroni. Mejo rinviare el progeto ca gavì, se no volì che vada tuto in ciupese e, durante el weekend, mejo se ste casa...
Sagittario: No ste farve deprimere da qualche intrigo in tel sgobo parchè ghe xe qualchedun ca no vede l'ora de iutarve, e non solo par el lavoro. Se sarì furbi, ve sfangarè la prima parte dela stimana che poi el weekend sarà de fogo...
Capricorno: E chi xe ca ve ferma? Sì determinati e spietati e l'obietivo nolve sfugirà. Non solo: qualchedun dal passato el se farà piacevolmente rivedere e anca quea roba ca gavevi dà par persa ve la trovè par le man. El weekend, giustamente, riposeve...
Acquario: Xe sta un periodo complicà e ghe xe sta un fià de cambiamenti. Xe el momento de sentarse zò e dare un ocio indrio, par controlare che tute le robe le sia sta fate ben. Ocio a chi ve sta intorno: qualcehdun vol rompere i maroni... Relax.
Pesci: Bei e frizzanti come un prosecco de quei boni. No ste dar massa peso ai dubi ca gavì e cerchè de aprofitare de que novità ca ghe sarà sia in tel sgobo ca in tee amicissie e, magari, anca in te l'amor. El weekend se prevede very very hot....
Oroscopo Vicentino Settimanale |
